P.s. Hester都有提供幫朋友仔搵one room/考試院/下宿既服務，有需要就搵我啦^^
首先走唔甩就一定要講下有咩類型既屋啦，不過其實網上都已經有唔少文章介紹過，所以我都唔太詳細講啦，約略介紹下同補充下人地冇既point啦～
1. One Room 원룸
One room其實意思係間屋係得一個房，開放式廚房冇間格一眼睇哂咁簡單。換然之一房一廳就叫Two Room(투룸)囉。 值得提一提搵屋既時候要留意埋佢係咪full option (풀옵션)即係佢係咪提供全套傢俬咁解, 有d可能乜都冇，咁就要自己買新/二手傢俬，唔係長期住既朋友可能要考慮下。因為韓國扔大型傢俬係要收費架~!
One room既好處係你真係自己有一間屋，一個屋企。唔洗同人share廁所/廚房等等。自由度大好多，又可以帶朋友番屋企玩(你知啦，人在異鄉，除左朋友你乜都冇)
如果咁岩包租公都住係果度呢，間唔中會拎啲泡菜呀，糕點比你既。或者屋企有啲咩事直接搵包租公都會幫人搞掂架
但One room既壞處係佔左9成都要最少簽一年約以上，間中會有啲比你簽短啲既都要6個月，但好難搵。所以短期過黎讀語學堂既朋友仔就未必適合啦。(如果未夠年期退屋既話，你一係要自己搵到人接租，一係就要再比中介費地產搵人架)
另外就係保證金問題，其實千萬個提醒各位要準備充足既資金先好租one room, 因為一大舊錢交去做保證金，變相你可以用既資金少左，到走果時拎番咁大筆韓圜又冇掟洗，兌番又蝕，除非匯率跌左好多啦
仲有就係雜費問題，有啲one room會有管理費3-5萬圜左右，可能會包埋水電上網，有啲就冇既。咁自己要慳住用同埋自己處理囉。同埋如果果度唔包上網既話，自己申請多數都要簽2-3年約
價錢(2016年)：
以慶熙/高麗大附近one room為例，保證金大約500~1000萬左右，月租一般30~50萬左右。
如果延世/弘大/西江/梨大附近呢，就會貴啲，一般保證金都1000萬起跳，月租就45~60萬不等。
不過其實你如果比唔到咁多保證金呢，好多都有商量既。例如1000萬保證金減到500萬，不過變相月租就可能貴番5萬左右。自己衡量下啦
**順便提下韓國好多叫做半地下(반지하)既屋，顧名意義即係有半層係地底既既地下室。價錢比一般既one room會平一截，但個人黎講我真係唔太建議大家住啦，因為通常呢啲屋都採光/空氣流通唔太好，而且熱天會有一陣霉味，長期住對健康唔太好。Hester係朋友間半地下住左唔夠一個月就已經頂唔順啦😖不過為節省生活費黎講都係一個選擇黎既
另外仲有既就係天台屋/屋塔房(옥탑방),即係大家睇屋塔房皇世子果啲啦。都係會比較平d，但一般會間屋比較細少少。另外同10個韓國人講住屋塔房10個都會話冬天特別凍，熱天特別熱。不過Hester住左8個月屋塔房又覺得冇乜野喎😂😂採光透氣仲特別好添!而且又有露台可以坐出去飲啤酒賞月
2. Officetel 오피스텔
Officetel其實都係one room既一種，不過見網上唔多人提過所以都介紹下比大家啦。其實Officetel即係Office+Hotel(唔知點解韓國人好興咁樣先成合成啲生字出黎😒)原本係針對啲在職人仕，屋企兼辦公室既概念整出黎既。不過在我黎睇只不過係靚啲既私人樓咁解。One room通常都係區內比較舊少少既屋(紅磚,秘密花園果啲呀)，Officetel就係比較高少少既大廈，同香港既私人樓差唔多。
好處
靚，乾淨，有保安，有𨋢
壞處
管理費5-10萬，貴，冇本土風味/人情味
價錢:
保證金1000萬以上，月租70-100萬不等
3. Apartment 아파트
同one room差唔多，只不過係私人屋苑咁解。除左睇繼承者果啲私人一個house之外，最靚就係apartemnt, 相信大家一啲都唔會陌生，因為睇超人回來了佢地全部都係住apartment. 下下間屋成千尺咁大，屋苑內都會有公園，康樂設施。但好多都係直接買賣。
價錢
約5000萬圜保証金+100萬圜租金
買賣約1億5000萬圜至4億圜
4. 考試院 고시원/고시텔
黎韓國住就點都唔少得考試院，原本係比啲學生近啲學校同埋集中溫書應付高考而衍生既板間房，不過依家愈來愈普及化，有唔少在職人仕同外國留學生都會選擇住考試院。雖然以前既考試院既生活環境真係幾差，一打開房門就係床，容納唔到2個人而且共用廁所。不過隨著時代時代變遷，多左好多又靚又舒服既考試院啦，仲可以有私人廁所添。
好處
唔洗保證金，可短租，平，可以認識同層朋友/外國人，大部分提供白飯/泡菜/拉麵/咖啡，月租包哂水電上網
壞處
空間小，隔音差，共用洗衣機/廚房，唔可以帶朋友番屋企，管理人多數唔識外語，唔識韓文難預約
價錢:
一般35~50萬左右，即使同一間考試院，因應有冇窗，窗向外街/走廊，大小，間間房價錢都有出入
5. 下宿
下宿其實即係住係host family咁上下，通常阿朱媽有一大間屋分左幾間房租比學生，都係共用廚房同考試院有啲似不過規模細啲，但重點係下宿會提供早/晚餐。
好處
有家既感覺，通常同隔離房可以好熟，提供早/晚餐唔洗煩，又可以食得健康啲
壞處
都係要同人share地方，唔算係自己屋企，冇得帶朋友番屋企，早/晚餐有時段限制，大部分屋比較舊
價錢:
50~70萬左右
5. Share house
近幾年新興既租屋方式，幾個人一齊合租一間大屋，好似大家睇<沒關係，是愛情呀！>咁上下，咁當然佢間屋算係比較靚果啲。有啲share house仲會有主題，e.g. 電影，運動，種植等等，等有相同嗜好既朋友一齊住有共同話題，好似電影屋就逢星期五晚會聚係客廳一齊開projector睇戲咁，hester係網上搵過一般share house都係6個月租約以上既
住大屋，識到志同道合朋友, 或者韓國/外國朋友
壞處
共用客廳/廚房/廁所，水電共同攤分，輪流打掃公共空間，如果遇到不適同屋朋友比較難避開，有1人房，但大部分都係2-4人房
價錢:
50-70萬圜
6. 宿舍
好簡單，即係學校宿舍咁解
好處
平，有保安，同學仔都係度，近學校
壞處
有門禁時間，2人share房，冇廚房，難申請
價錢:
約15~20萬圜
方法
1. 奮韓
內地網站，在韓留學生聚集點。無論搵工，生活資訊，簽証，時事都可以係度搵到資料，包括租屋，多數都係內地學生畢業回鄉就會係度放屋，但因為係個人名義放屋小心騙案，要佢一齊去地產係合約簽名先好比錢。因為係中文網站唔識韓文既朋友都可以睇得明。
2. 직방/다방
韓國搵屋網兼mobile app. 基本上韓國人搵屋都係睇呢度，個人屋主或者地產都會上載樓盤係呢度，可以因應地區同set budget顯示適合既屋出黎，相當之方便。但同上面一樣，如果搵個人屋主要小心有可能最後走數比唔番保證金你。同埋全韓文，唔識韓文既朋友淨睇相。
3. 不動產
即係地產，韓國啲地產舖多到好似便利店咁。走去同佢講你想搵咩條件既屋就可以, 但有限制既就係佢地只會有番自己果區既屋，同埋樓盤可能唔多，要走多幾間先拉到。都係果句，韓文冇番4,5級都難同佢地溝通到。一定有中介費，係睇間屋既價格用公式計既, 一般12萬~25萬左右。
